Felix Benesch

La contribuziun tracta da la vita e carriera dal star la schlagers, shows e films da San Murezzan Vico Torriani (1920 – 1998) sut l’aspect da sia plurilinguitad.

• In factur decisiv per la carriera singulara da Vico è stà sia plurilinguitad che sa reflectescha en ses num ed en numerusas da sias chanzuns.
• El ha duvrà a moda conscienta ses flair internaziunal e sa sentiva sco ambassadur d’ina nova internaziunalitad. En Germania dal suenterguerra, destruida e trumatisada, è quai crudà sin terren particularmain fritgaivel.
• Da l’autra vart ha Vico polarisà il public en sia atgna patria. Era en il Grischun n’han blers betg acceptà el sco «in dals noss». Quai ha gì effects negativs sin ses success internaziunal e sin sia instabilitad.
• Vico era in autodiact ed in amatur. Quai ha rendì sia carriera relativamain labila. El è adina puspè stà sfurzà da s’adattar a las circumstanzas. 

La carriera da Vico Torriani (1920 – 1998), star da schlagers, shows e films, creschì si a Schlarigna e San Murezzan, è stada singulara. El è probablamain fin al di dad oz il trategnider cun il pli grond success che la Svizra ha mai enconuschì.

La carriera da Vico ha tuttavia cumenzà mo plaun, e cura che quella ha inizià, era el cun 30 onns en ina vegliadetgna già detg avanzada. Sia partenza è stada tut auter che optimala: El era creschì si en relaziuns da famiglia simplas e desastrusas, senza access a scolas cuntinuantas.

Ma el era creschì si cun quatter linguas. Questa plurilinguitad, che sa reflectescha era en numerusas da sias chanzuns, è senza dubi era stà ina da las raschuns decisivas per ses success senza paregl.

Ins po sminar ch’el haja duvrà ses flair internaziunal a moda fitg conscienziusa. El sa veseva sasez sco ambassadur da la nova internaziunalitad da ses temp. En la Germania dal suenterguerra, destruida e traumatisada, è quai crudà sin terren particularmain fritgaivel.

En Svizra percunter han ins adina puspè fatg dad ester cun Vico. Quai po avair gì da far cun ses success immens en Germania ch’era per la Svizra anc paucs onns avant in adversari da guerra potenzial. Ins po dentant supponer anc in’autra raschun per l’acceptanza relativamain pitschna da Vico en sia atgna patria: Cuntrari als collegas da show sco Peter Alexander, che ha fatg ina scolaziun solida, è Vico stà e restà in autodidact ed in amatur. Quai ha rendì sia carriera relativaman labila. El è sa midà pliras giadas en il decurs dals onns ed è stà vers la fin malperina cun sasez. El sa sentiva controllà da forzas exteriuras.