Harald Schneider

• Tge consequenzas ha la lingua estra englais per las linguas chantunalas grischunas?
• Co influenzescha l’englais la plurilinguitad svizra?
• È l’englais – sco lingua franca – ina furma dad imperialissem cultural resp. linguistic?
• Tge stadis psichics èn colliads cun la lingua estra englais?
• Tge consequenzas sa resultan da l’implementaziun dal englais sco lingua (da standard) da scola?

L’artitgel preschent persequitescha questas dumondas en il rom dad ina retschertga empirica. La dumonda centrala è: En tge mesira influenzescha la lingua estra englais la plurilinguitad resp. la «pasch linguisitca» en il chantun Grischun? En quest connex dat l’autur l’emprim ina curta survista istorica dal svilup da linguas estras sco lingua franca en general e da l’englais en spezial.

Alura vegn examinà la posiziun da l’englais sco lingua estra en scola e societad, spezialmain en vista a las cundiziuns da rom spezialas da la cuntrada da furmaziun svizra. Latiers vegnan explitgads exempels analogs da terras cun premissas cumparegliablas (Luxemburg, Italia).

La posiziun da l’englais (Early English, English Only, etc.) entaifer il canon curricular da roms, er sut la glisch da la dominanza sfranada da certificats da lingua en scolas e scolas autas, vegn messa en dumonda. En il rom da las retschertgas empiricas menziunadas, vegn empruvà da rispunder a la dumonda sche l’englais – sco lingua franca – cumporta er ina mcdonaldisaziun culturala e tge effects sin autras linguas ins po observar. En quest connex persequitescha la contribuziun suandanta la finamira da constatar in fenomen e na commentescha betg svilups actuals da la politica da linguas.